Liliput Iputz: Pitutur

Ana unen-unen
yen cah wadon kuwi bebasan kedawan rambut krubetan jarit, akeh saru sikune.
Mula ngertia yen cah wadon kuwi luwih apes lan akeh sing nggodha ana ing
ngendi-endi panggonan. 

Apa maneh ing
jaman saiki. Ing jaman edan sing kaya ngene akeh wong lanang sing gampang kena
panggodhane setan. Wong lanang sing kena panggodhane setan iku seneng
nyedhak-nyedhak karo wong wadon sarana ngandhakake kabecikane, pangkate,
bandhane, omahe, lan liya-liyane. Aja gumun yen dheweke loma, gelem tur sering
ngulungi apa-apa. Pamprihe keturutan kang diseja napsune. Sahingga wani kandha
ngajak urip bebarengan. Mulane, Ndhuk...Cah Ayu, yen ana wong lanang kang kaya
ngono tumindake sliramu kudu waspada, kudu ngati-ati. Nyuwuna pitulung marang
Gusti Allah. Supayane awakmu selamet lan entuk pituduh hidayahe Gusti. Aja
waton "nyah-nyoh" gampangan lelamer keli marang pambujuke setan.
Amarga wis ora sithik wong lanang kang duwe tumindak kaya ngono kuwi jebule
mung glembuk manis "rayuan gombal". Wusanane jebul mung arep ngrusak
kaperwirane wong wadon. Sepisan maneh, aja pisan-pisan  mung kepencut
baguse, luwese, pangkate lan liya-liyane. Kabeh mau anggepen setan kang awujud
manungsa kang arep gawe rusak marang sliramu. 

Sejatine kang
aran bagus lan becik iku dudu rupane, dudu pangkate, lan dudu bandhane.
Ananging kang aran bagus lan becik iku, wong lanang kang perwira, kang ora
gelem sembrana karo wong wadon kang ora samestine. Wong lanang kang perwira
duwe tumindak tatakrama lan seneng tetulung kanti aris lan sabar. Wong lanang
kang perwira kuwi babar pisan ora nduweni watak adigang, adingung, adiguna
tuwin sregep banget anggone ibadah lan nyambut gawe. Mula aja sepisan-pisan
sliramu ngenyek wong lanang kang katone ora duwe bandha. Aja dumeh saiki
dheweke lagi mplarat, banjur sliramu tega nyepelekna. Sawangen kae wong wadon
sing uripe ning kutho, sing nduweni pikiran kadonyan,
"materialistik". Uripe mung tansah susah mikir bandha. Kaya manuk
klabakan ana sajroning kurungan, mung tansah ngerkasa lan ora diparingi seneng
uripe dening Gusti Allah. Apese wong kaya ngono kuwi, nalika diparingi
kesenengan bandha lan pangkat nuli gumedhe lan medhit. Naudzubillah! 

Nduk, ...Cah
Ayu, bandha lan pangkat kuwi sayektine ora bisa nyelametake  uripmu lahir
batin. Kabeh ora langgeng. Yen ora kepeneran tegese ora kuwat bandha lan
pangkat kuwi malah njalari ati peteng. Mula leganana uripmu marang paringane
Allah. Yen sira duwe panarima, semeleh, menep lan dhemen syukur insya Allah
uripmu bakal tentrem lan ayem. Aja pisan-pisan semugih marang sapa bae,
becikana marang tanggamu. Luwih-luwih yen pancen jodhomu tembe kuwi wong sugih
utawa pangkat, aja pisan-pisan rumangsa edi lan mulya. Ngelingana yen kabeh iku
mung saderma nampa titipan saka ngersane Gusti Allah. Aja nganti lali anggonmu
dhemen tetulung marang wong sing pada kekurangan. Aja nganti lali zakatmu!
Ngertia yen kahanane bandha lan pangkat kuwi sejatine mung kanggo nguji sepira
taqwane manungsa marang gustine.  Sepira gedhene bekti kawula marang
Gustine.

Dene menawa
sira diganjar dening Gusti Allah dadi wong mlarat. Mula aja cilik atimu. Amarga
obah musike jagad iki ana sing nglakokake. Ora ana liya kang bisa ngobahake
jagad saisine iku, kejaba mung Gusti Allah. Mula saka iku aja nganti kendhat
anggonmu nyenyuwun marang Gusti Allah. Nyuwun slamet ndonya akhirat,tetep
pinaringan iman lan Islam, kanti menganggo tata carane fakir. Mangertia bilih
nyuwun reksa marang Gusti Allah iku luwih perlu katimbang ngendelake kekuatane
bandha, pangkat lan gegaman kang luwih landhep. Mlarat kuwi dudu musibah,
nanging pacobaning urip kang sejatine minangka tetunggangan/kendaraan kang
bagus lan rikat lakune kanggo nggayuh swargane Allah. Mangkono kuwi tumpraping
kang gelem mikir lan wong-wong kang sabar. Sira kudu bisa nuladha kesabarane
Siti Imroatun anggone teguh iman Islame sahingga ora kepincut marang gebyare
bandha emas picis raja brana. Mula saka iku dak wanti-wanti marang sira aja
nganti lena marang kabeh pacobaning uripmu.

Gendhuk-Gendhukku
sing tansah katon ayu-ayu! Sarana banget gedhene tresnaku marang sliramu. Becik
elinga pitutur iki. Mumpung kabeh durung kadhung kelakon. Sing ati-ati anggonmu
sesrawungan. Luwih-luwih karo wong lanang. Sira kudu ngedhunake tlapukan mpripatmu
yen kepethuk wong lanang. Sing prasojo! Aja nganeh-nganehi. Aja dhemen gawe
"sensasi" lan aja ngatonake pepahesmu. Kejaba pepahes kang wus adate,
kanti nutupi sirah lan gulumu tumeka dada. Aja nganti tiru-tiru turis sing pada
uda sadalan-dalan ngatonake aurate. Aja kepincut ngganggo suwal lan kathok
cekak, pamer pupu lan wentismu kaya lumprahe sing lagi didhemeni bocah wadon
saiki. 